![Click to enlarge sarbaz31.jpg](http://dc179.4shared.com/img/201040967/6e0b2c48/sarbaz31.jpg?sizeM=3)
بهارگاه ءَ وَش آتک ،
و بهارگاه ءَ وتی وانوکاں مبارک بات گوئشاں !
بهارگاه ءِ دلکش و وَش زیدیں موسم ءِ آیگ ءَ ، په وتی وانوکاں مبارک بات گوئشوں . بهارگاه دلانی بُوْد زورَگ ، مئی گلزمین ءِ میتاپیں کوه و ڈگار ءِ ، و هم مئی اُمیتانی سَبز بَـیـَـگ و ردوم زورگ ءِ وهد انت .
بهارگاه ، وشّیں زَنک و بَرانی وهد و مولُم انت .
بهارگاه ، سَبزی و کاوکانی ، پـُلّ و گلابانی ، مُرگانی و چَمّگانی وش زیملیں توار ءِ وهد انت .
بهارگاه شیر و شیلانچانی ، لـَـڈ و بارانی ، گوشت و شکارانی ، وَش کوشیں سَمینانی ، دلکشیں مولُمانی وهد انت .
بهارگاه هما وهد انت که جو وکـَؤراں چه آپاں کـَیل و پـُـرّ بَنت . کار و کِشتکاری شاهگان و گیش بَنت .
بهارگاه هما وهد انت که مئی مرادانی اُمیت جَمّــَر بَندَنت و همے جَـمّـَراں مردمانی گِهبودی و وَش هالی ءِ گواه ءَ بنت .
بهارگاه ، ڈکاّل ءِ کـُـٹــّـَـگ و آباتی ءِ شاهد و گواه انت . بیا ایت که ما هم وتی پگر و امیتاں ، گوں وطن ءِ بهارگاه ءَ نوک کناں ، تا په وتی راج ءِ باندات ءَ وَشهالی و آباتی ، دیمرئی و سوبانی گوانک و توار به بیاں !
بهارگاه ءِ نیکیں مولم ، سرجمیں وانوکاں مبارکبات !
هر روزتان نوروز ، نوروزتان پیروز !
فرا رسیدن عید باستانی نوروز را که سرآغاز فصل شکوفائی ، شکفتن و بهار است به همه خوانندگان گرامی تبریک عرض نموده و برای یکایک شما تمنیات نیک و آرزوی شکوفائی فکری و پیشرفت های همه جانبه آرزومندیم !
به امید پیروزی مهر و بهار بر استبداد سرزمین!
به امید پایان رنج های هموطنان ! نوروز را از صمیم قلب تبریک میگوییم !
بهارگاه
بهار اهـــت و پدا رُســت انت بهاراں
پدا سر ســبـز و پل پوش انت دیاراں
سمین شاهیں پری گـَل چت په ناچ ءَ
به چار مستی ، به چار سَه دار و داراں
سروز مرگانی ، وش گـُٹـیں توار انت
به چار تــرڈ انت ، کوه پاچن هزاراں
به چار آهـوگ و آسکانی ماں چماں
دگـه رنـــگ و دگــه امـیـت ءِ یاراں
به چار دنــیا دراه ورنــا بَــیان انت
لگوشیت کهنگیں هم رنگ و باراں
به چار چـَـمّـگ به چار جوگانی مستی
به زیــر بودے بهار ءِ چه مــلاراں
بچار دراهیں جهان چون رنگ زیریت
به چار آزاتــیـانی راه ءَ ، چــاراں
بچار درچکاں گَل ءَ نوکیں گُدے دتک
براں په توشگاں زور انت هاراں
زندء چیدگ zend-e chedag ======
دل تئی راه ء
پولگ انت چو ،
لک سال
هم تئی آتار اشکناں
هم بواں چناں
هم تئی نرم و گوں بهاری ،مهراں زراں
هم تئی وهدئ
ترانگ و یاتاں،
زندء راه
باهوٹ من بیاں...
تو من ء
هر وهداں زرۓ
واهگء دیربالیں جڑاں،
مسکیں کیلگ و میتاپاں شل ۓ !
پراهیں زرء گورم و شل و موجاں،
زیمل ۓ
تو من ء هر وهد زندگ ۓ...
تو چو دپتان(تفتان)ۓ
هم دلء دیتاں(دوتاں)
گوں کن ۓ دیوانے بزیں
هم کدیں ایرموش ،
تو دلء داگاں چکگ ۓ
هم کدیں ارساں
دوت و گوکرتاں ریچگ ۓ
هم کدیں پاهار ،
هم کدیں استیں گرندگ ۓ
لیک بے موچ هم،
تئی توار برزانت،
برز برز
چارگ انت پرتو بامء استار هم
چه آزمان
هم سمین کشیت په ترا، پد شومیں لوار
هم بهار نودشان
پرتئی آتار پل شان،
تو پما زندء چیدگ ۓ
تو په مئی باندات
ره نشان،
په بلوچ راج ء ،
زندء چو ڈیوای ء بل ۓ
هم په استارانی
چاپ و نازینکاں شات بئے...